Дөрвөн жил тутамд болдог FIBA буюу Олон улсын сагсан бөмбөгийн холбооны 16 дахь удаагийн Дэлхийн аварга шалгаруулах тэмцээн 2010 оны наймдугаар сарын 28-наас есдүгээр сарын 12-ныг дуустал Турк улсын дөрвөн хотод болно. Анх 1950 онд Аргентинд болж байсан тус тэмцээнд 24 баг оролцдог бөгөөд зургаа, зургаагаараа дөрвөн хэсэгт хуваагдан өрсөлддөг юм. Харин тэмцээний эхний шатны оноолтыг өнгөрөгч мягмар гаригт Туркийн нийслэл Станбул хотноо зарлалаа.
NBA гэх мэргэжлийн сагсан бөмбөгийн лигээр алдартай АНУ-ын шигшээ баг тэмцээний "В" группт Ираны хамт багтжээ. Мөн энэ хэсэгт Хорват, Бразил, Тунис болон Словенийн багууд багтсан байна. Дэлхийн аваргад аваргаа хамгаалах тоглох Испанийн шигшээ "D" группт Литва, Франц, Ливан, Канад болон Шинэ Зеландын хамт өрсөлдөх бол Грек болон Туркийн баг "С" хэсэгт БНХАУ, ОХУ, Пуэрто-Рик болон Зааны ясан эргийн хамт багтжээ. FIBA-гийн чансааны жагсаалтыг тэргүүлж буй Аргентиний шигшээ багийн тухайд "А" группт Серби, Австрали, Йордан, Герман болон Анголын хамт өрсөлдөх юм. Дашрамд дурдахад, тэмцээний ялагч нь "автоматаар" 2012 оны Лондонгийн олимпод оролцох эрхтэй болно.
Тэмцээний эхний шатанд нийт 60 тоглолт явагдах бөгөөд багууд хэсгийнхээ бусад таван багтай тоглох юм. Хэсэг тус бүрээс шалгарсан тус бүр дөрөв, нийт 16 баг хасагдах журмаар тоглосоор дэлхийн аваргыг тодруулах учиртай.
Өнгөрсөн хугацаанд долоон өөр улсын сагсан бөмбөгийн шигшээ багийнхан дэлхийн аваргаар өргөмжлөгдөж байснаас ЗХУ, Югослав болон АНУ нар хамгийн олон удаа буюу тус бүр гурван удаа түрүүлж, дэлхийн аваргын цом хүртэж байжээ.
Та бүртгэлгүй байна. Та бүртгүүлж байж илүү давуу эрх эдлэх болно!
